ਬੇਗਰਜ਼ ਮਹਿਕ

1.

ਬੇਗਰਜ਼ ਨੇ
ਮਹਿਕਾਂ ਜੋ ਵੰਡਦੇ 
ਫੁੱਲ ਰੰਗ ਬਰੰਗੇ  
ਗਰਜ਼ੀ ਬੰਦੇ
ਕੁਝ ਸਿੱਖੋ ਇਨ੍ਹਾਂ ਤੋਂ
ਲੈ ਕੀ ਜਾਣਾਂ ਜਹਾਂ ਤੋਂ । 

2.
ਲਾਲੀ ਉੱਡ ਕੇ
ਚੜ੍ਹੀ ਏ ਅਸਮਾਨੇ
ਖੂਨ ਹੋਆ ਮੁਲਤਾਨੇ 
ਖੂਨੀ ਰੰਗ ਦਾ
ਬੁੱਲਾ ਇੱਕ ਆਇਆ
ਦੋਵੇਂ ਘਰ ਉਜਾੜੇ । 

3.
ਢਾਬਾਂ- ਛੱਪੜ
ਭੌਣੀ,ਲੰਮੀਆਂ ਲੱਜਾਂ
ਪਿੰਡੋ -ਪਿੰਡ ਜਾ ਲੱਭਾਂ
ਮਿਟੇ ਨੇ ਸਾਰੇ
ਥੱਲੇ ਹੀ ਥੱਲੇ ਪਾਣੀ
ਬਣੂੰ ਰੇਤ-ਕਹਾਣੀ । 

ਇੰਜ:ਜੋਗਿੰਦਰ ਸਿੰਘ ਥਿੰਦ
                  (ਸਿਡਨੀ)

ਕੱਖਾਂ ਦੀ ਕੁਲੀ

1.
ਪੌਲੀ ਕੁ ਤੇਲ
ਹਟੀਓਂ ਲੈ ਦੀਵੇ ਪਾ
ਚਾਨਣ ਕਰ ਲਿਆ
ਇਹ ਦਿਵਾਲੀ
ਮਾਹੀ ਬਿਣ ਨਾ ਭਾਵੇ
ਦੀਵੇ ਦੀ ਲੋ ਸਤਾਵੇ ।

2.
ਮੇਰੇ ਵਰਗੇ
ਬੈਠੇ ਨੇ ਬਾਡਰ 'ਤੇ
ਕਈ ਦੀਵੇ ਘਰ ਦੇ
ਫੁੱਲ ਝਿੜੀਆਂ
ਸਿਰਾਂ ਉਤੋਂ ਲੰਗਣ
ਦਿਲੋਂ ਸੁਖਾਂ ਮੰਗਣ ।
   
3.
ਕੱਖਾਂ ਦੀ ਕੁਲੀ
ਬੈਠੀ ਤੱਕਦੀ ਥਾਲੀ
ਬੱਚੇ ਮੰਗਣ ਰੋਟੀ
ਅੱਜ ਦੀਵਾਲੀ
ਹਸਰਤਾਂ ਦੀ ਬਾਲ੍ਹੀ
ਭੁੱਖ-ਚਾਨਣ  ਵਾਲੀ

ਇਜੰ: ਜੋਗਿੰਦਰ ਸਿੰਘ  ਥਿੰਦ
                 (ਸਿ਼ਡਨੀ)
 

ਮੈਂ

 1.
ਪੰਜ ਤੱਤ ਦਾ
ਹੰਡਿਆ,ਨਦੀ ਕੰਡੇ
ਮਸਾਂ ਝੱਲੇ ਥਪੇੜੇ
ਮੰਗੇ ਨਾ ਮਿਲੇ
ਭੁਗਤੇ ਜਿੰਨੀ ਲਿਖੀ
ਮਿੱਟੀ 'ਚ ਮਿੱਟੀ ਮਿਲੀ । 

2.
ਲੇਖ ਮੱਥੇ ਦੇ
ਕੌਣ ਬੁੱਝੇ ਤੇ ਦੱਸੇ
ਪਿਛਲੇ ਜਾਂ ਅਗਲੇ 
ਮਨ ਜੇ ਖੁਸ਼
ਤਾਂ ਭਾਗ ਹਨ ਚੰਗੇ
ਨਹੀਂ ਤਾਂ ਮੰਦੇ-ਮੰਦੇ । 

ਇੰਜ: ਜੋਗਿੰਦਰ ਸਿੰਘ ਥਿੰਦ
               (ਸਿੰਡਨੀ)
 

ਅੱਲੜ ਪੁਕਾਰ

ਸੁਣ ਮਾਏ ਮੇਰੀਏ ਨੀ, ਮੇਰੀ ਹਾਨਣਾ ਦਾ ਲੰਘ ਗਿਆ ਪੂਰ ।

ਜਿਵੇਂ ਢਿੱਡ ਰੋਟੀ ਮੰਗਦਾ,ਇਵੇਂ ਮਾਂਗ ਮੇਰੀ ਮੰਗਦੀ ਸੰਧੂਰ ।

ਅੱਗੇ ਸ਼ੀਸ਼ੇ ਦੇ ਖਲੋ ਕੇ, ਜਦੋਂ ਪਾਨੀ ਆਂ ਮੈਂ ਕਜਲੇ ਦੀ ਧਾਰ ।

ਕਦੀ ਕਰਦੀ ਹਾਂ ਗੁੱਤ, ਕਦੀ ਜੂੜਾ ਢਾਹ ਕਰਾਂ ਵਾਰ ਵਾਰ ।

ਬੁੱਤ ਜਿਹਾ ਬਣ ਜਾਂਦੀ,ਵੇਖ ਵੇਖ ਮੈਨੂੰ ਅੱਤ ਚੜ੍ਹਦਾ ਸਰੂਰ ।
                                ਸੁਣ ਮਾਏ ਮੇਰੀਏ ਨੀ...............

ਕਦੀ ਅੱਗ ਲੱਗ ਲੱਗ ਜਾਏ, ਕਦੀ ਉਠ ਬੈਠਾਂ ਅੱਬੜ ਵਾਹੇ

ਲੱਗਦਾ ਏ ਬਾਰ ਬਾਰ ਮੈਨੂੰ, ਜਿਵੇਂ ਕੋਈ ਘੋੜੀ ਚੜੀ ਆਵੇ ।

ਦਿਲ ਵੱਜੇ ਮੇਰਾ ਧੱਕ ਧੱਕ, ਮੈਨੂੰ ਦੱਸੋ ਮੇਰਾ ਕੀ ਹੈ ਕਸੂਰ ।
   
                                 ਸੁਣ ਮਾਏ ਮੇਰੀਏ ਨੀ............    

ਗੁੱਡੀਆਂ ਪਟੋਲੇ ਮੈਨੂੰ ਉਕੇ, ਹੁਣ ਚੰਗੇ ਨਹੀਓਂ ਲੱਗਦੇ

ਭਾਬੀਆਂ ਦੇ ਸਭੇ ਗਹਿਣੇ , ਮੈਨੂੰ ਬਹੁਤ ਸੋਹਣੇ ਲੱਗਦੇ

 ਪਾ ਕੇ ਪੰਜੇਬਾਂ ਮੈਨੂੰ  ਵੇਖ , ਡਾਹਡਾ ਚੜ੍ਹਦਾ  ਫਤੂਰ

ਸੁਣ ਮਾਏ ਮੇਰੀਏ,ਮੇਰੀਆਂ ਹਾਨਣਾਂ ਦਾ ਲੰਘ ਗਿਆ ਪੂਰ

ਜਿਵੇਂ ਢਿੱਡ ਰੋਟੀ ਮੰਗਦਾ,ਇਵੇ ਮਾਂਗ ਮੇਰੀ ਮੰਗਦੀ ਸੰਧੂਰ

     ਇੰਜ: ਜੋਗਿੰਦਰ ਸਿੰਘ  ਥਿੰਦ
                 ( ਸਿਡਨੀ)
 

ਇਹੋ ਕਹਾਣੀ

1.
ਵਿੱਚ ਵਿਹੜੇ
ਇੱਕ ਬੂਟਾ ਲਾਇਆ
ਖਾਦ-ਪਾਣੀ ਪਾਇਆ
ਲੱਗਿਆ ਬੂਰ
ਤਨ -ਮਨ ਸੜਿਆ
ਕਹਿਰ ਹੈ ਵਰ੍ਹਿਆ । 

2.

ਇੱਕ ਪਟੋਲਾ
ਗੁੱਡੀ ਸਿਰ ਪਾਇਆ
ਤੇ ਲਾਡ ਲਡਾਇਆ
ਕਿੱਥੇ ਗੁੱਡੀਆਂ
ਬਚਪਨ ਗੁਆਚਾ
ਖਾਧੇ ਦੋਵੇਂ ਜਵਾਨੀ । 

ਇੰਜ: ਜੋਗਿੰਦਰ ਸਿੰਘ  "ਥਿੰਦ"
             (ਸਿਡਨੀ)

ਮਾਰ ਸੁਹਾਗਾ

(1)

ਤੜਕੇ ਉੱਠ
ਪਾ ਬਲਦਾਂ ਪੰਜਾਲੀ
ਕੱਢੇ ਸਿਆੜ |
     
(2)
ਪਾਉਂਦਾ ਬੀਜ
ਹੋਈ ਤਿਆਰ ਪੈਲੀ
ਮਾਰ ਸੁਹਾਗਾ |

 (3)
ਥੱਕੇ ਬਲਦ
ਪਿੰਡੇ ਦੇਵੇ ਥਾਪੀਆਂ 
ਪਾਵੇ ਗਤਾਵਾ | 


ਇੰ- ਜੋਗਿੰਦਰ ਸਿੰਘ ਥਿੰਦ
              ( ਸਿਡਨੀ)

ਕਿਸ ਹੱਥ ਡੋਰ

1.
ਚੜੀ ਪਤੰਗ
ਕਿਸੇ ਹੱਥ ਹੈ ਡੋਰ
ਹਵਾ ਅੱਗੇ ਕੀ ਜੋਰ
ਹੰਕਾਰੀ ਡੁੱਬਾ 
ਕਰਦਾ ਮੇਰੀ ਮੇਰੀ
ਕੀ ਹੈ ਵੁਕਤ ਤੇਰੀ |

2.
ਚਿਹਰੇ ਵੱਖ
ਰੱਬ ਨੇ ਲਿਖੇ ਲੇਖ
ਬਣਾਏ ਆਪੇ ਭੇਖ
ਬੰਦੇ ਦੇ ਕਾਰੇ
ਖੂਨ ਦਾ ਇਕੋ ਰੰਗ
ਫਿਰ ਕਿਉਂ ਏ ਜੰਗ |

ਇੰ:ਜੋਗਿੰਦਰ ਸਿੰਘ  ਥਿੰਦ
(ਸਿਡਨੀ)